(( آخــر المشــوار ))

عدد الرسائل : 12 تاريخ التسجيل : 11/06/2008

(( آخــر المشــوار ))

أنــا في أوّل الدنيـا .. وهـي في آخــر المشــوار
..................... وبينـي وبينهـا أمــيــال مـن الآلام والـحـسـرة

خطـاوي تنتظرهـا اشـواك في دربٍ كثيــر اخطــار
..................... وفيه من الألــم والخــوف والهجــران يـا كـثـره

أشوف الصعـب قدامــي واشوف الـشـرّ والأشــرار
..................... واشوف المــوت قدّامي .. يـمـدّ من الوله جسـره !!

أشوف امطـار تتساقط .. وانا عشقـي وهـواي امطـار
..................... ولكنّـه مـطـر يـحـرق .. غزير وملتهـب جـمـره !

طريقٍ مـرعـب ومجهـول .. وانا كنت احسِـب انه سارّ
..................... صغيّـر قلبـي ومعـذور ... وينـه وويـن هالعثـره ؟!

أنـا كنـت اعتقـد إنّـي بلاقـي في طريقـي ازهــار
..................... أشم الورد واليـاسميـن واشـوف الـفـرحـة منتشره

واصاحب نشـوة الدنيا واغـنّـي غـنــوة الأطيــار
..................... واطيـر مثـل الفراشـه فـوق واسابقهـا على الزهره

وإيـدي بإيد خلاّنـي وعلى طــول العمــر سمّــار
..................... نصيح ونزعل ونرضــى ... محسوديـن على العِشـره

معانـي الـحـب مكتملـه وفينـا الصـدق والإيثــار
..................... ولا نحسـد ... ولا نكـره ... بـلا حقـد وبـلا غيـره

تـخـيّـلـت الزّمــان بخـيــر ... لا ظالم ولا غدّار
..................... ولا نظرة ألــم فيها .. ولا دمعــه .. ولا عَـبْــره

كثيــره كانت ظنونـي .. وأغلبها كــذب مــا صار
..................... أنا مالوم سوى قلبـي ... يا صغـري .. ويا صغـره !

تخيّـلـنا أنا وقلبي كثير اشياء ... كـنّــا صْغــار !
..................... ولكـنّ القـدر قاســي .. وهـذا صـوتـه وأمْــره

وهذا حـال مشــواري وهـذي عـيّـنـة أخــبـار
..................... ويظـلّ الأمـر فـي إيــدي سـواءً حلـوه أو مُـرّه

على يْمينـي وعلى يْسـاري وحوالينـي دروب كْـثـار
..................... ولكنّـه ولا واحـد يوصّـلـنـي لـفـجـر بكــره !

أبوصـل لج .. لأنّـج تستحقيـن المشـي في النّــار
..................... لأنّـج تستحقيـــن التـعـب والـريـح والغَـبْـره

لأنّـج فــوق كـل النـاس .. لأنّـج عاليـة مقــدار
..................... لأنّـج فــوق كـل المــاس والياقــوت والــدرّه

بمرّ من العـنـا لاجلـج .. بعدّي اللـيـل والأسـوار
..................... تذكّـرت النبي ( أيـوب ) ... وباخذ عزمـه وصبـره

وخطيت الخطوه الأولى ... وانا حافي وطريقي حــار
..................... وثانـي خطوتي كانت رجل مكســوره في الحفـره !

وثالثهـا قدم واقف ومـتـألّـم علـى مـسـمـار !
..................... ورابعها الألـم أهـون ... طَرف مجـروح من إبره !

على وين الألــم يمضي وانا معْ قســوة الاقـدار ؟
..................... على وين الضيــاع يسـوق والأوهــام تبي تجرّه ؟

بـدايــة رحـلـتـي هـذي !!! بدايتها ألم واعذار
..................... واشوف انّ المدى اقسـى ... عذاب وجروح منتثره !

أبمشيهـا !! ... أبمشيهـا وبـواجـه لعنـة الأدوار
..................... واشوف البعد وش عنده .. واشوف الموت وش عذره

أبمشيهـا .. ولو حـار الزّمـن فيني وعقلـي طـار
..................... مثل ذاك الشجـاع اللـي يلاقـي رمـحـه بصـدره

ووصلـت لنـص هالدنيا .. قطعنا نصـف هالمشوار
..................... وانـا دايــس علـى روحــي مـعَ آلام مندثـره

واشوف النصـف من باقـي طريق الشـرّ والأشـرار
..................... طريقٍ يبدو أكثــر ظلمــةٍ من مـا مضـى وشرّه

مشيت .. وكنّـي الماشـي بعكـس المجـرى والتيّار
..................... واعــاند بحــر أيـامي واخــالف مدّه وجزره

صراحه اللي تخيّلته .. مــا يوصل ربــع معشار
..................... ثقيلـه حــيــل خطواتــي لو ما عندكم فكـره

يضيـق الكون في دربي .. يضيـع العزْم والإصرار
..................... ولو عـادت بي سنينـي .. مــا جرّبته لو مَـرّه

ولكني أبوصـل لج .. لأنّـج عـالـيـة مقــدار
..................... لأنّـج تستحقيـن التعــب والريــح والغَبــره

أبوصـل لج .. لأنّـج تستحقين المشـي في النّـار
..................... لأنّـج فـــوق كـل المـاس واليـاقـوت والدرّه

أنـا عـازم على النيّـه .. لاني شـاك ولا محتـار
..................... وهـذا قلبـي نـاذر لـج ... ولازم يـوفـي بنذره

قـراري واتخذته بحــزم .. وعزمي ما عليه غبار
..................... وأعلنتـه عـلـى كــل المــلا بسـرّه وجهـره

وشفت المــوت في أول دروبي ولـج أنـا مختـار
..................... ولا عمـري ندمت انّي رهنـت لج عـمـري بكبـره

قريب انّـي أبوصـل لـج ... مـا يمنعني إلا جْـدار
..................... أبصعد فوقـه وباقول : يـا حظّــي ويـا سحــره

قريب انّـي أبوصـل لـج ... من الأميـال باقي امتار
..................... واشـوف اللي تخيلته .. أمِـسّ إيـده .. أشِـم عطره

قريب انّـي أبوصـل لـج ... وشوفي من عليج يغـار
..................... شوفي وش مـدى نزفـه .. وشوفي وش كبـر كسره

.

.

.

وهذا وخلّص المشـوار ... وينــج يا ضوا الأنوار ؟!
..................... زجاجـة عطـرج فـ يدّي .. مـا فيهـا ولا قطـره !!

ربابة حزنـي وحزنـج .. ليـه مـا فيها أي اوتار ؟!
..................... وبروازج بـلا صـوره .. بـلا بسمه .. بـلا نظره !!

وهذا دفتر اشعــاري .. ويـن الشعـر والأسـرار ؟!
..................... ولا كلمـه على اوراقه !! ولا حـرفٍ على سطـره !!

وينج يا نظـر هالعيـن ... وينج يا أمــل هالــدار
..................... وينج ياللي كنتي انتي ... سبب حزنـي وسبب شِعـره

يبيج اللي تعب لاجلج .. وغيـرج مــا قـدر يختـار
..................... يبيج اللي تعب لاجلج .. وحمل حلمــه على ظهـره

يبيج اللي تعب لاجلج .. ولاجلج صـال وجـال وثـار
..................... يبيج اللي تعب لاجلج .. وأفنـى لج زهــر عمــره

يبيج اللي تعب لاجلج .. وكتـب في عينـج الأشعــار
..................... يبيج اللي تعب لاجلج .. وسكـب في سكّتـج حبــره

بعد كل هالتعـب والعمــر ... وطيّ العمر في الأسفار
..................... تكوني بـس مجرّد وهــم .. ما يحمــل ولا ذرّه ؟!

خســاره كلّ ما عشته ... خســاره الروح والأنظار
..................... خســارة عمـري اللي راح ... معَ يسره ومعَ عسره

مثـل ما قلـت يا قلبـي بـدال المـرّه لك أمـــرار
..................... تجمّـل بالصبـر .. واصبر على هالمــر والحــرّه

علـى طــول العمــر حظّـك عليك يتجنّـب ويندار
..................... ولكـن احتسـب واصبـر .. وخذ من خيـره وأجـره

وهذي رحلتي كانت ... دمع مدرار .. نــدم جبّــار
..................... ياليت انّي وقفـت بيـوم .. وعطيت لعمـري قد قدره

أنا في آخــر الدنيــا ... وهي ما كفّــت المشوار
..................... وبينـي وبينهـا أميـــال مـن الآلام والحســره

وكل ما أخطي بخطوه .. أدوس اشواك واشوف اخطار
..................... وفيني من الألـم والخـوف والهجــران يا كثــره

للمبدع جداً .. المبتعد